Demokrazija?

Morena ġiet u marret - jew marret u ġiet b'idha f'idha. Ma stennejtx affarijiet kbar, mhux għax naħseb li l-kantanta jew l-awturi m'għandhomx talent imma għax għandi dubji serji dwar il-mod kif jiġu magħżula l-kanzunetti rebbieħa kemm lokalment kif ukoll fuq livell Ewropew (avolja qatt ma fhimt kif l-Israel jitqies pajjiż Ewropew).

Immaġina kirurgu li jagħmel ix-xogħol tiegħu skond ir-rieda tal-maġġoranza - min jgħidlu għamel hekk u min jgħidlu mod ieħor - biex ikun demokratiku, joqgħod għar-rieda tal-maġġoranza - li ma tifhimx! Il-pazjent ftit ikollu tama. Il-kanzunetta rebbieħa qed tintagħżel b'dan il-mod - naħseb li għandna speċjalisti li jafu jevalwaw kanzunetta imma jew għax mhux fdati jew għal xi raġuni oħra ħadnielhom il-poter u tajnih lil pubbliku li jivvota bit-telefon. Nibża li f'soċjetà żgħira bħal dik tagħna li fiha kulħadd jaf lil kulħadd qed nispiċċaw nivvotaw lil min nafu minflok lil min naħsbu li għandu l-aħjar ċans.

Il-farsa tal-votazzjoni Ewropea lanqas hemm għalfejn nitkellmu dwarha għax ma nistgħu nagħmlu xejn għajr li nuru d-disapprovazzjoni tagħna. Xi ħadd qalli li kif sejra x-xejra ta' votazzjonijiet lil pajjiżi ġirien il-Eurovision se jkun iddominat mill-pajjiżi tal-Lvant.