Taħt Sant Iermu

Nhar il-Ħadd 18 ta’ Mejju filgħodu, flimkien ma’ sieħbi Bernard, inżilt taħt Sant Iermu fejn bdejna nsegwu ġrajjiet li seħħew eżattament 443 sena qabel.

18 ta’ Mejju: Dawk għassa Sant Anġlu u Sant Iermu lemħu l-flotta Torka tletin mil ’il barra mix-xatt joqorbu mix-Xlokk. Mal-ewwel ingħata is-sinjal miftiehem sabiex in-nies jinġabru ġewwa l-ilqugħ tas-swar, filwaqt li l-iMdina u Għawdex ġew avżati bl-isparar ta’ zewġ kanuni. In-nies iffullaw minnufih għall-kenn tal-Birgu, ikaxkru warajhom tfal, annimali u kull ma kellhom. Sabiex ma jinġabarx kullħadd ġewwa l-Birgu, il-Granmastru kien pront bagħat il-Kmandant Gabriel Gort lejn Port Aragon sabiex jidderieġi wħud min-nies lejn San Mikiel.

Hekk jibda r-rakkont ta’ l-Assedju l-Kbir ta' Francisco Balbi di Correggio, arkebusier Spanjol li, ta’ sittin sena, ġġieled tul l-Assedju.

Inżilna taħt Sant Iermu, fejn qattajna ftit tal-ħin qisna żewġ boloħ, nikkonsultaw riproduzzjonijiet ta’ mapep antiki. 'Min jaf kieku t-Torok kienu ħadu l-Malta, kieku llum il-Maltin jemmnux li t-Turkija għanda tkun parti mill-UE?' spiċċajt naħseb. Imma l-istorja hi dik li hi, u l-istess il-preżent. Flok flotta ta’ l-Ottomani, flotot ta’ dgħajjes mimlija b'imigranti illegali (jew irregolari, ma' nafx liema hi l-verżjoni politikament korretta) deħlin tista tara. Ħarist lura lejn Sant Iermu, u warajh rajt xena ta’ invażjoni oħra. Fl-isfond ta' Sant Iermu, il-proġett ta’ Tigne jieħu xejra ferm aktar mostruża milli qatt rajtu jieħu qabel. Bilmod tlajna lura lejn il-Belt. 'Nispera li ma nerġax insib l-partitarji tal-futbol jimblukkaw it-toroq kollha ta’ madwar il-Belt bħall-bieraħ,' kont qed naħseb.

Fl-1565, wara ftit xhur twal, it-Torok qatgħu qalbhom u telqgħu. Imma llum, ħadd ma għadu ħareġ b’soluzzjoni raġonevoli għall-imigrazzjoni, l-isfruttament ta’ l-art dejjem tiżdied, u għal kull ħaġa ta’ xejn noħorġu ninvadu t-toroq f’isem il-politika, sport, qaddis jew xi alla ieħor.